روى المهندس أحمد حسين صبور، رئيس مجلس الإدارة لشركة الأهلي صبور للتطوير العقاري، عن شخصيته منذ الصغر: "كنت مدلّع شوية، بس كنت جد، يعني فيه Combination كده.. واشتغلت من تحت جدًا، من وأنا سني 15 سنة كنت لازم أروح أشتغل شهر في الصيف كل سنة، من غير ما حد يفرض عليا".

وأضاف عن أول تجربة عملية له: "أول شغل لي كان في المطبعة الهندسية، زمان ما كانش فيه كمبيوتر أو تكنولوجيا حديثة، كل اللوح الهندسية كانت بتتطبع هناك وكانوا بيشتغلوا بمادة اسمها النشادر. كنت بدخل من 8 الصبح لغاية 5 مساءً ودايخ من الريحة، والوالد دايمًا يقولي: 'واخشوشنوا فإن النعم لا تدوم'".

وأكد صبور أن التجربة علمته الصبر والمثابرة: "الموضوع علمنا إن النجاح مش بييجي من مكان فاضي، إنما من الجد والعمل من الصغر. حتى لو البداية صعبة، لازم تتحمل المسؤولية".

أول خطوة في حياتي المهنية

وعن بداياته المهنية بعد الدراسة في أمريكا: "اشتغلت في مكتب والدي أقل من سنتين، لكن بعد سنة وشوية حسيت إني عايز أعمل حاجة تانية. لم يكن هدفي التوسع أو إنشاء مجموعة أعمال ضخمة، لكن كنت مؤمن إن الواحد لازم يشتغل في حاجة عنده شغف شديد بيها".

وأضاف: "ذهبت للتطوير العقاري لأنه المجال اللي بيشدني أكتر، ووالدي شجعني وقال لي: 'أنت بتحقق لي حلم بقالي 20 أو 30 سنة، فشاركني!'".

تأسيس أول شركة عائلية

وأشار صبور إلى تأسيس أول شركة عائلية: "أسسنا سنة 1989 شركة 'المهندسون للتنمية والتعمير' ونجحنا فيها، عملنا خمس عمارات في خمس سنوات، وكانت تجربة تعليمية رائعة".

وأوضح أن مكتب والده الاستشاري نفذ مشاريع كبرى: "زي فندق الإنتركونتيننتال، ومدينة السادات، ومدينة 6 أكتوبر، وكلها كانت تحت إشراف مكتب صبور الاستشاري، اللي ساهم في تطوير مدن جديدة في مصر".

أثر الوالد في المجتمع والعمل التطوعي

وعن تأثير والده في المجتمع: "والدي قعد 22 سنة رئيس نادي الصيد، ولما جاء يترشح كان شباب النادي طالبوه إنه يكون الرئيس، وده بسبب تأثيره الكبير واحترامه بين الشباب".

وأكد صبور أن كل هذه التجارب شكلت فلسفة العمل لديه: "من الصغر تعلمنا الصبر، الاعتماد على النفس، وتحمل المسؤولية، وده اللي خلاني أبدأ مسيرتي في التطوير العقاري وأحقق نجاحات ملموسة".